ఘనంగా అన్నమయ్య దినము ద్వాదశి

  ఘనంగా అన్నమయ్య దినము ద్వాదశి

తిరుపతి, జూన్‌ 05, 2013: పరమపవిత్రమైన ద్వాదశి తిథినాడు పదకవితా పితామహుడు శ్రీ తాళ్లపాక అన్నమాచార్యుల వారు శ్రీవారిలో ఐక్యమైన మహత్తర సందర్భాన్ని పురస్కరించుకుని తితిదే బుధవారం నాడు తిరుపతిలోని అన్నమాచార్య కళామందిరంలో ‘అన్నమయ్య దినము ద్వాదశి’ని ఘనంగా నిర్వహించింది. ఈ సందర్భంగా మధ్యాహ్నం 1.00 గంటకు భక్తులకు అన్నప్రసాద వితరణ చేశారు. అంతకుముందు ఉదయం 9.30 గంటలకు దినము ద్వాదశి సంకీర్తనలతో అన్నమాచార్య ప్రాజెక్టు కళాకారులు గోష్ఠిగానం నిర్వహించారు. ఉదయం 11.00 గంటలకు అన్నమాచార్య ప్రాజెక్టు కళాకారుడు శ్రీ జి.చంథ్రేఖర భాగవతార్‌ ”మహాభారతంలోని పద్మవ్యూహం” అంశంపై హరికథా పారాయణం చేశారు. సాయంత్రం 6.00 నుండి 7.00 గంటలకు అన్నమాచార్య ప్రాజెక్టు పూర్వ సంచాలకులు డాక్టర్‌ మేడసాని మోహన్‌ ధార్మికోపన్యాసం, అనంతరం సంగీత సభ జరుగనున్నాయి. ఈ కార్యక్రమంలో అన్నమాచార్య ప్రాజెక్టు అధికారులు, విశేషసంఖ్యలో భక్తులు పాల్గొన్నారు.