అశ్వ వాహన సేవలో అలరించిన సాంస్కృతిక కార్యక్రమాలు

అశ్వ వాహన సేవలో అలరించిన సాంస్కృతిక కార్యక్రమాలు

ఏడు రాష్ట్రాల నుంచి 21 కళాబృందాలు.. 539 మంది కళాకారుల సాంస్కృతిక సందడి

భక్తి.. కళ.. సంస్కృతి సమ్మేళనంతో శోభాయమానమైన తిరుమాడ వీధులు

తిరుమల, 2026 సెప్టెంబరు 22: తిరుమల శ్రీవారి సాలకట్ల బ్రహ్మోత్సవాల్లో చివరి వాహనసేవగా జరిగిన అశ్వ వాహన సేవలో మంగళవారం సాయంత్రం వివిధ రాష్ట్రాల కళాకారుల సాంస్కృతిక ప్రదర్శనలు భక్తులను విశేషంగా ఆకట్టుకున్నాయి. కళాకారుల కళారూపాలతో తిరుమాడ వీధులు భక్తిభావంతో, ఆధ్యాత్మిక సందడితో కళకళలాడాయి.

శ్రీవారి వాహనసేవను వీక్షించేందుకు తరలివచ్చిన భక్తులను అలరిస్తూ కళాకారులు కోలాటం, చెక్కభజనలు, కర్రసాము, తప్పెటగుళ్లు, డప్పు వాయిద్యాలు, భరతనాట్యం తదితర జానపద, శాస్త్రీయ కళారూపాలను ప్రదర్శించారు. సంప్రదాయ జానపద కళలతోపాటు శాస్త్రీయ నృత్య ప్రదర్శనలు భక్తులను విశేషంగా ఆకట్టుకున్నాయి.

తిరుమాడ వీధుల్లో కళాబృందాలు ఉత్సాహభరితంగా ప్రదర్శనలు ఇస్తుండగా భక్తులు ఆసక్తిగా తిలకించారు. కళాకారుల నృత్యాలు, వాయిద్యాల నాదాలు వాహనసేవకు మరింత శోభను చేకూర్చాయి. భక్తి, కళ, సంస్కృతి సమ్మేళనంతో తిరుమాడ వీధులు ఆధ్యాత్మిక వైభవాన్ని సంతరించుకున్నాయి.

ఏడు రాష్ట్రాల నుంచి కళాబృందాల ప్రదర్శనలు

ఈ వాహనసేవలో ఆంధ్రప్రదేశ్, తమిళనాడు, కర్ణాటక, సిక్కిం, ఉత్తరప్రదేశ్, ఉత్తరాఖండ్, తెలంగాణ రాష్ట్రాల నుంచి 21 కళాబృందాలకు చెందిన 539 మంది కళాకారులు పాల్గొని తమ కళా ప్రదర్శనలతో భక్తులను అలరించారు.

టీటీడీ ముఖ్య ప్రజాసంబంధాల అధికారిచే విడుదల చేయబడినది.