శ్రీవారి నవరాత్రి బ్రహ్మోత్సవాల్లో ఆధ్యాత్మిక వైభవం

శ్రీవారి నవరాత్రి బ్రహ్మోత్సవాల్లో ఆధ్యాత్మిక వైభవం

నాదస్వరం.. వేద సందేశం.. అన్నమయ్య సంకీర్తనలు.. హరికథతో భక్తిపారవశ్యం

భక్తులను విశేషంగా ఆకట్టుకుంటున్న టీటీడీ ధార్మిక, భక్తి సంగీత కార్యక్రమాలు

తిరుమల, 2026 అక్టోబరు 15 ; తిరుమల శ్రీవారి నవరాత్రి బ్రహ్మోత్సవాలను పురస్కరించుకుని టీటీడీ హిందూ ధార్మిక ప్రాజెక్టుల ఆధ్వర్యంలో గురువారం నిర్వహించిన ధార్మిక, ఆధ్యాత్మిక, భక్తి సంగీత కార్యక్రమాలు భక్తులను విశేషంగా ఆకట్టుకున్నాయి. నాదస్వరం, వేద సందేశం, నామ సంకీర్తన, అన్నమయ్య సంకీర్తనలు, విష్ణు సహస్రనామ పారాయణం, భక్తి సంగీతం, ధార్మికోపన్యాసం, హరికథ వంటి కార్యక్రమాలతో తిరుమల ఆధ్యాత్మిక శోభను సంతరించుకుంది.

నాదనీరాజనం వేదికపై భక్తి సంగీత విభావరి

తిరుమలలోని నాదనీరాజనం వేదికపై ఎస్వీ సంగీత నృత్య కళాశాల ఆధ్వర్యంలో తెల్లవారుజామున 4.30 నుంచి 5.30 గంటల వరకు శ్రీమతి లక్ష్మీ సువర్ణ, శ్రీ చంద్రశేఖర్ బృందాలు నాదస్వర ప్రదర్శన నిర్వహించాయి. ఉదయం 5.30 నుంచి 6.30 గంటల వరకు శ్రీ వేంకటేశ్వర ఉన్నత వేద వేదాధ్యయన సంస్థ ఆధ్వర్యంలో వేద సందేశం అందించారు.

ఉదయం 11 నుంచి మధ్యాహ్నం 12 గంటల వరకు డాక్టర్ వి.జె. ద్వారంలక్ష్మి బృందం నామ సంకీర్తన నిర్వహించింది. సాయంత్రం 5 నుంచి 6.30 గంటల వరకు శ్రీమతి రమ్య బెహరా, శ్రీ అనురాగ్ కులకర్ణి బృందాలు ఆలపించిన అన్నమయ్య సంకీర్తనలు భక్తులను భక్తిపారవశ్యంలో ముంచెత్తాయి.

ఆస్థాన మండపంలో ఆధ్యాత్మిక కార్యక్రమాలు

తిరుమల ఆస్థాన మండపంలో ఉదయం 7 నుంచి 8 గంటల వరకు తిరుపతికి చెందిన శ్రీమతి ప్రసన్నలక్ష్మి బృందం విష్ణు సహస్రనామ పారాయణం నిర్వహించింది. ఉదయం 10 నుంచి 11.30 గంటల వరకు విజయవాడకు చెందిన శ్రీమతి కార్తీక త్రివేణి బృందం భక్తి సంగీత కార్యక్రమాన్ని అందించింది.

ఉదయం 11.30 నుంచి మధ్యాహ్నం 12.30 గంటల వరకు హైదరాబాద్‌కు చెందిన శ్రీమాన్ పరాకాలన్ స్వామి ధార్మికోపన్యాసం చేశారు. సాయంత్రం 4 నుంచి 5.30 గంటల వరకు తిరుపతికి చెందిన శ్రీమతి ఆర్. సుశీల బృందం ఆలపించిన అన్నమయ్య సంకీర్తనలు అలరించాయి. సాయంత్రం 5.30 నుంచి రాత్రి 7 గంటల వరకు తిరుపతికి చెందిన శ్రీ రాముడు బృందం హరికథా గానం నిర్వహించింది.

భక్తిభావంలో మునిగిన భక్తజనం

శ్రీవారి నవరాత్రి బ్రహ్మోత్సవాల సందర్భంగా నిర్వహిస్తున్న ఈ ఆధ్యాత్మిక కార్యక్రమాలను భక్తులు పెద్ద సంఖ్యలో వీక్షించి, శ్రీవారి నామస్మరణలో మునిగిపోయారు. సంగీతం, వేద పారాయణం, సంకీర్తనలు, ప్రవచనాల ద్వారా భక్తుల్లో ఆధ్యాత్మిక చింతనను పెంపొందించేలా టీటీడీ ఈ కార్యక్రమాలను నిర్వహిస్తోంది.

టీటీడీ ముఖ్య ప్రజాసంబంధాల అధికారిచే విడుదల చేయబడినది.