PEDDA SESHA VAHANAM ON NOV 17 _ నవంబ‌రు 17న పెద్దశేష వాహనంపై శ్రీ మ‌ల‌య‌ప్ప ద‌ర్శ‌నం
Tirumala, 07 November 2023: In connection with Nagula Chaviti on November 17, Pedda Sesha Vahana Seva will take place in Tirumala on the same day evening.
As part of this Sri Malayappa Swamy will take a celestial ride on the Seven hooded Pedda Seaha Vahanam and parade along the four mada streets between 7pm and 9pm to bless His devotees.
నవంబ‌రు 17న పెద్దశేష వాహనంపై శ్రీ మ‌ల‌య‌ప్ప ద‌ర్శ‌నం
నవంబ‌రు 7 తిరుమల, 2023: తిరుమలలో నవంబ‌రు 17వ తేదీన నాగులచవితి ప‌ర్వ‌దినం సందర్భంగా శ్రీ మలయప్పస్వామివారు ఉభయదేవేరులతో క‌లిసి తిరుమాడ వీధులలో పెద్దశేషవాహనంపై విహరిస్తూ భక్తులను కనువిందు చేస్తారు. సర్పరాజైన ఆదిశేషువు జగన్నాథునికి నివాస భూమిగా, తల్పంగా, సింహాసనంగా స్వామివారికి విశేష సేవలందించినట్లు పురాణాలు చెబుతున్నాయి.
శ్రీ వేంకటేశ్వరస్వామి సహస్రనామాలతో శేషసాయి, శేషస్తుత్యం, శేషాద్రి నిలయం అంటూ నిత్య పూజలందుకుంటున్నాడు. అటు రామావతారంలో లక్ష్మణుడిగా, కృష్ణావతారంలో బలరామునిగా స్వామివారికి అత్యంత సన్నిహితునిగా వ్యవహరించే ఆదిశేషువు శ్రీవైకుంఠంలోని నిత్యసూరులలో ఆద్యుడు. ఈ విధంగా స్వామివారు దాసభక్తికి మారురూపంగా నిలిచే తన ప్రియ భక్తుడైన శ్రీ ఆదిశేషుడిపై ఉభయదేవేరులతో కూడి విహరిస్తూ భక్తులకు అభయమివ్వడమే కాకుండా శరణాగతి ప్రపత్తిని కూడా సాక్షాత్కరింపచేస్తాడు. అందుకే బ్రహ్మోత్సవ వాహనసేవలలో కూడా తొలి ప్రాధాన్యత ఆదిశేషునికే ఆ భగవంతుడు ప్రసాదించారు.
కాగా, నాగుల చవితి పర్వదినాన్ని పురస్క‌రించుకుని తిరుమల నాలుగు మాడ వీధులలో రాత్రి 7 నుండి 9 గంటల నడుమ శ్రీ మలయప్పస్వామివారు తమ ఉభయదేవేరులతో క‌లిసి విహరిస్తూ పెద్దశేష వాహనంపై కటాక్షించనున్నారు.
టీటీడీ ప్రజాసంబంధాల అధికారిచే జారీ చేయబడినది.